Модда алмашинувининг нормал ва патологик холатларда бошкарилиши гормонал бошқарилиши.Гипофиз тузилиши.Гипофиз ва гипоталамус гормонларининг биологик самараси.Кайта богланиш маханизми.

Эндокрин безлар функциясини назорат қилувчи ва координацияловчи МАТ(марказий асаб тизими)нинг муҳим қисмларидан бири гипоталамус бўлиб, унда аденогипофиз гормонларининг синтези ва секрециясини бошқаришда қатнашувчи нейросекретор ядро ва марказлар жойлашган

Эндокрин безлар функциясини назорат қилувчи ва координацияловчи МАТ(марказий асаб тизими)нинг муҳим қисмларидан бири гипоталамус бўлиб, унда аденогипофиз гормонларининг синтези ва секрециясини бошқаришда қатнашувчи нейросекретор ядро ва марказлар жойлашган. 1-расм. Гипоталамо-гипофизар тизим Гипоталамус – бош миянинг кўрув нервлари ва кўриш тракти кесишган жой, бош мия оёқчалари ички қирғоғи ва сўрғичсимон тана орасида жойлашган соҳа. Катта ёшли одамларда гипоталамус массаси 4 граммни ташкил қилади. Cильвиев водопроводидан Монроев тешикка томон йўналувчи гипоталамик эгат гипоталамусни кўрув дўмбоғидан ажратиб туради. Гипоталамусда 3 йирик соҳа фарқланади: перивентрикуляр, медиал ва латерал. Ҳар бир соҳа бир қанча ядролардан ташкил топган. Перивентрикуляр соҳада битта зона ва 6 ядро мавжуд: преоптик перивентрикуляр зона, олд перивентрикуляр ядро, супрахиазматик, дорсомедиал, туберал магноцеллюляр, аркуат ёки ёйсимон (баъзида инфундибуляр дейилади), паравентрикуляр-перивентрикуляр ядро. Гипоталамуснинг медиал соҳасида медиал преоптик соҳа, медиал преоптик ядро, олинги гипоталамик соҳа, паравентрикуляр ядро, вентромедиал, перифорникал ядро, орқа гипоталамик зона ва медиал мамилляр (сўрғичсимон) ядролар жойлашган. Латерал соҳага латерал преоптик зона, латерал гипоталамик зона ва супраоптик ядролар киради. Супраоптик ядронинг нейросекретор ҳужайралари кўпроқ вазопрессин, паравентрикуляр ядро эса окситоцин ишлаб чиқаради. Гипоталамуснинг вентромедиал ядроси тўқлик маркази, гипоталамуснинг латерал қисми эса очлик маркази ҳисобланади. Шунинг учун ҳам, вентромедиал ядронинг шикастланиши одатда семизлик билан кечади. Гипоталамус функциясининг бузилиши фақатгина икки томонлама шикастланганда кузатилади. Олд гипоталамусда иссиқ ва совуққа сезгир нейронлар жойлашган; орқа гипоталамус иссиқлик узатилишини таъминлайди. Олд гипоталамус инфекцион касалликларида эндоген пирогенлар (интерлейкин-1) таъсирида простагландин Е2 миқдори кўпаяди, бу эса иссиқлик узатилишнинг камайиши ва тана ҳароратининг ортишида намоён бўлади. Бундан ташқари, олд гипоталамусда уйқу маркази жойлашган бўлиб, унинг шикастланиши уйқусизликка олиб келади. Гипоталамуснинг вентромедиал қисми ва премамилляр зонаси шикастланиши қисқа муддатли хотиранинг бузилишига олиб келади. Олд гипоталамус вегетатив нерв тизимининг парасимпатик қисмини, орқа гипоталамус эса симпатик қисмини стимуллайди. Гипоталамус медиал дўнгликда портал тизимни ҳосил қилувчи қон томирларга бой. Супраоптик ва паравентрикуляр ядролар қон билан энг кўп таъминланган соҳалар саналади. Гипоталамуснинг юқорида санаб ўтилган ядроларида жойлашган ўрта дўнгликнинг гистологик соҳасида кўп миқдорда нейрон охирлари жойлашган контакт зона мавжуд бўлиб, бу нейронлар секрети (гипофизотроп гормонлар) гипофизнинг дарвоза (портал) капиллярларига қуйилади. Портал системанинг веноз капиллярларидаги махсус тешиклар (шунтлар) медиал дўнгликнинг периваскуляр бўшлиғига қондан йирик молекуляр массадаги бирикмаларнинг ўтишига имкон яратади. Гипофиз — понасимон суяк турк эгарчасининг гипофизар чуқурчасида жойлашган ички секреция бези (3-расм). Диафрагма билан қопланган турк эгарчаси — гипофизнинг гипоталамус билан боғловчи оёқчалари ўтадиган қаттиқ мия пардаси тешиги тармоғи. Гипофиз массаси 0,5- 0,7 г, ўлчами 1,3x0,6x1,0 см, лекин бу кўрсаткичлар ёш ва жинсга қараб ўзгариши мумкин (аёлларда эркакларга қараганда каттароқ). 2-расм. Турк эгарчаси анатомияси Гипофизнинг асосан икки бўлаги фарқланади: олд бўлак (аденогипофиз) – безнинг 70 % вазнини ташкил қилади ва орқа (нейрогипофиз)бўлак. Аденогипофиз шартли равишда олд дистал, воронкасимон ва оралиқ бўлакларга бўлинади. Гипофизнинг олд бўлаги Ратке чўнтагидан – эмбрион оғиз бўшлиғининг воронкасимон эпителиал бўртмаси томи (орқа девор)дан ривожланади. Орқа бўлак эса миянинг III қоринчаси туби дивертикуласи ҳужайраларидан ҳосил бўлади. Оралиқ бўлак одатда анатомик аниқ эмас ва у олдинги бўлак билан биргаликда аденогипофиз таркибига киритилади. Эмбриогенез жараёнида гипофиз ҳужайралари турк эгарчасидан ташқарига чиқиши мумкин ва улар гипофиз ортиқлари дейилади. Гипофиз эктомиядан сўнг бу ортиқлар баъзи гипофизар гормонларнинг минимал секрециясини таъминлаб туриши мумкин. Аденогипофиз асосан уч хил без ҳужайраларидан иборат: хромофиллар гуруҳини ҳосил қилувчи ацидофил ва базофил ҳужайралар ҳамда хромофоблар. Ацидофил (эозинофил) ҳужайралар гипофиз олдинги бўлаги ҳужайраларнинг 30—40 фоизини ташкил қилади. Гормон ишлаб чиқарилишига кўра ацидофиллар икки типга бўлинади: ўсиш гормонини (ЎГ) ишлаб чиқарувчи соматотрофлар ва пролактин ажратувчи лактотрофлар. Базофиллар ҳажмига кўра ацидофиллардан катта бўлиб, аденогипофиз ҳужайраларининг 10 фоизини ташкил қилади. 3 хил типдаги базофил ҳужайралар тафовутланади: I тип — тиреотроп гормон (ТТГ) ишлаб чиқарувчи тиреотрофлар, II тип — АКТГ-ишлаб чиқарувчи кортикотрофлар ва III тип — икки хил гормон - фолликулостимулловчи (ФСГ) ва лютеинловчи гормон (ЛГ) ишлаб чиқарувчи гонадотрофлар. Шундай қилиб, физиологик шароитда ҳар қайси типга мансуб ҳужайралар фақатгина бир турдаги гормон ишлаб чиқаришга ихтисослашган. Патологик ҳолатларда эса, айниқса, ўсмали жараёнларда бу ҳужайралар мультигормонал секретор фаолликка эга бўлиши мумкин, масалан бир вақтнинг ўзида ЎГ, пролактин ва бошқалар синтезланиши мумкин. 3-расм. Гипофиз тузилиши Бу хусусият аденогипофиз ҳужайраларининг ягона ўзак ҳужайрадан ривожланганлигидан далолат беради. Хромофоб ҳужайралар — аденогипофизнинг энг йирик ҳужайралари бўлиб, барча ҳужайраларнинг 50-60% ни ташкил қилади. Бу ҳужайраларга хромофиллар дифференсацияланадиган ҳужайралар манбаи сифатида қаралади. Гипофизоцитлар популяциясида яна бир турдаги ҳужайралар доимо учрайди: керакли вақтда у ёки бу ҳужайрага дифференсацияланадиган камбиал ҳужайралар. Аденогипофиз хромофоблари орасида майда, узун ўсимталарга эга фолликуляр-юлдузсимон ҳужайралар кузатилади. Бу ҳужайралар вазифаси ҳалигача аниқланмаган; фақат уларнинг маълум шароитларда цитокинлар ишлаб чиқариши ҳақида маълумотлар бор. Гипофизнинг оралиқ бўлаги асосан проопиомеланокортин (ПОМК) ишлаб чиқарувчи йирик базофил ҳужайралардан ташкил топган. Одамда гипофизнинг бу бўлаги яхши ривожланмаган. Нейрогипофиз —оралиқ мия воронкаси тубининг ҳосиласи бўлиб, ўрта тепалик соҳаси, кулранг дўнглик ва воронка бандидан иборат гипофизнинг орқа бўлагини ўз ичига олади. Хусусан нейрогипофизда гипоталамуснинг супраоптик ва суправентрикуляр ядроларидан келувчи гипоталамо-гипофизар тракт толалари тугайди. Орқа ва оралиқ қисмларда аркуат ядро дофаминэргик нерв ҳужайралари толалари тугайди. Нейрогипофизнинг орқа бўлаги ғовак капиллярлар тўрини қуюқ ўраб олувчи эпендима ҳужайраларидан иборат. Тўғноғичсимон терминалли аксовазал синапсларда нейросекретор ҳужайралар аксонлари тугаб, улар орқали гипоталамус ядролари секрециялари –вазопрессин (антидиуретик гормон) ва окситоцин гормонлари тушади. Гипофизнинг қон билан таъминланиши ички уйқу артерияси ва бош миянинг артериал (Виллизиев) ҳалқаси тармоқлари бўлмиш юқори ва пастки гипофизар артериялар томонидан амалга оширилади. Пастки гипофизар артериялар нейрогипофизни қон билан таъминлайди, юқори гипофизар артериялар эса портал система деб аталувчи гипоталамус билан боғланган жуда кўп томирлар тўри билан уланган бўлиб, аденогипофизни қон билан таъминлайди. 4-расм. Гипоталамик-гипофизар тизим Портал система медиобазал гипоталамуснинг медиал тепалигида жойлашган.У капиллярларнинг икки системасини ўз ичига олади: юқори гипофизар артерия артериолалари шохланиб бирламчи капиллярлар тўрини ҳосил қилади, бу капиллярлар жуда кўп қовузлоқлар ва коптокчалар ҳосил қилиб, аркуат, вентромедиал ва паравентрикуляр ядролар майда пептидэргик ҳужайралар аксонлари билан боғланади. Бирамчи тўр капиллярлари гипофизар оёқчалар бўйлаб олдинги бўлакка йўналувчи портал веналарда йиғилади ва у ерда улар без паренхимаси трабекулалари орасида шохланадиган синусоид типдаги капиллярларга бўлиниб кетадилар (иккиламчи капилляр тўр). Гипофиз олдинги бўлаги гормонлари билан тўйинган қон иккиламчи капилляр тўри синусоидлари орқали олиб кетувчи венага йиғилиб, қаттиқ мия пардаси веноз системасига қуйилади ҳамда умумий қон айланиш доирасига ўтиб кетади. Аденогипофиз иннервацияси бўйиннинг юқори тугунлари билан боғланган уйқу чигалидан келувчи постганглионар симпатик толалар томонидан амалга оширилади. Аденогипофиз организмга кўп томонлама гормонал таъсир кўрсатиши туфайли эндокрин тизимнинг калит регулятори ҳисобланади. У ишлаб чиқарувчи гормонлар (JlГ, ФСГ, ТТГ, АКТГ) мувофиқ равишда периферик эндокрин безлар функциясини бошқаради: қалқонсимон без, буйрак усти бези пўстлоқ қавати. Бошқа гормонлар (ЎГ, пролактин) орган ва тўқима-нишон ҳужайраларига бевосита таъсир қилади. Асаб тизими билан гипоталамус орқали боғланиб турувчи гипофиз ягона функционал тизим таркибига кириб, гормонларнинг циркад (суткалик), ой, фасл ва бошқа ритмик тебранишлари каби организмнинг ички муҳити доимийлигини сақлашни таъминлайди. ГОРМОНЛАР БОШҚАРИЛИШИДА ҚАЙТА БОҒЛАНИШ МЕХАНИЗМИ Машҳур олим М.М. Завадовский илк маротаба 1933 йилда эндокрин безлар фаолиятининг бошқарилиш қонуниятларини ўрганаётиб “манфиймусбат ўзаро таъсир” принципини яратди, кейинчалик эса бу атама “қайта боғланиш механизми” номини олди. Қайта боғланиш принципи асосида маълум бир тизим охирги маҳсулотининг (масалан, гормон, нейротрансмиттер ва бошқалар) тизим фаоллигини ёки охирги маҳсулот (гормон) миқдорини ўзгартиришга қаратилган тизим таркибидаги компонентларни бошқарувчи ёки функциясини ўзгартирувчи таъсири ётади. Организмнинг ҳаётчанлиги кўпгина ўз вазифасига эга ўз-ўзини бошқарувчи тизимларга (айириш, юрак қон-томир, нафас олиш ва б.) боғлиқ ва улар ҳам ўз навбатида нейроэндокрин-иммун тизим орқали назорат қилинади. Бу турли ўз-ўзини бошқарувчи тизимлар йиғиндиси ҳам ўзидан юқори турувчи тузилмаларга қарамлигини англатади. Охирги натижа ёки тизим фаоллиги икки йўл орқали бошқарилади: 1) стимуляция йўли – охирги маҳсулот миқдорининг кўпайиши ёки тизим фаоллигининг пасайиши; 2) ингибирлаш йўли - охирги маҳсулот миқдори ёки тизим фаоллигининг пасайиши. Бошқаришнинг биринчи йўли – мусбат, иккинчиси эса манфий қайта боғланиш дейилади. Мусбат қайта боғланишга қондаги маълум бир гормон миқдорининг ортиши бошқа гормоннинг ажралишига стимулловчи таъсир қилиши мисол бўлади (қонда эстрадиол миқдорининг ортиши гипофиздан ЛГ ажралишини оширади); манфий қайта боғланишда эса бир гормон миқдорининг ортиши бошқа гормон секрециясини камайтиради (қонда тироид гормонлар миқдорининг ортиши гипофиздан ТТГ ажралишини камайтиради). 5-расм. Қайта боғланиш функционал даражалари Гипоталамо-гипофизар бошқарув механизмлари қайта боғланиш принципига асосланади. (5-расм.). “Узун” қайта боғланиш занжири периферик эндокрин безлар билан гипофиз ва гипоталамик марказлар ўртасида ҳосил бўлади (баъзи маълумотларга кўра супрагипоталамик ва МАТнинг бошқа соҳалари билан боғланади), циркуляцияланувчи қон таркибидаги гормон миқдори келтирилган марказларга билвосита таъсир қилади. “Қисқа” қайта боғланиш занжири асосида гипофизнинг троп гормони (масалан, АКТГ) секрециясининг ошиши бошқа гипофизотроп гормон секрециясини стимуллайди ва модификациялайди (бу ҳолатда кортиколиберинни стимуллайди). “Ультрақисқа” қайта боғланиш занжири – гипоталамусдан ташқари ўзаро алоқа кўриниши бўлиб, бир гипофизотроп гормон ажралиши бошқа бир гипофизотроп гормон секрецияси ва ажралиш жараёнларига таъсир қилади. Қайта боғланишнинг бу кўриниши ҳар қандай эндокрин безда ўз ўрнига эга. Аксонлар орқали окситоцин ёки вазопрессин ажралиши шу нейронларни ва ҳужайралараро муносабат (ҳужайрадан ҳужайрага)орқали шу гормонларни ишлаб чиқарувчи нейронлар фаоллигини бошқаради. Яна бир мисол келтириш мумкин, пролактин ажралиши ва ҳужайралараро бўшлиққа диффузияланиши қўшни лактотроф ҳужайралардан пролактин ажралиб чиқишига пасайтирувчи таъсир кўрсатади. 6-расм. Қайта боғланиш механизми “Узун” ва “қисқа” қайта боғланиш “ёпиқ” тизим, яъни ўз-ўзини бошқарувчи тизим типида ишлайди. Аммо улар ички ва ташқи сигналларга қисқа вақт ичида ўзини бошқариш принципини ўзгартириб жавоб қайтаради (масалан, стрессда). Шу билан бирга келтирилган тизимларга кун ва тун алмашинуви билан боғлиқ биологик циркад ритмни сақловчи механизмлар ҳам таъсир қилади. Циркад ритм организм гомеостазини бошқариш ва ўзгарган ташқи муҳитга мослашишни таъминловчи тизимнинг бир қисми ҳисобланади. Кун-тун ритми тўғрисидаги информация тўр парда орқали МАТнинг супрахиазматик ядроларига узатилади, бу ядро эса эпифиз билан биргаликда марказий циркад ритм – “биологик соат”ни ҳосил қилади. Кун-тун механизмидан ташқари бу “соат” фаолиятида бошқа регуляторлар ҳам қатнашади (тана ҳароратининг ўзгариши, дам олиш ҳолати, уйқу ва б.). Гипофиз ва гипоталамус гормонларининг биосинтези, секрецияси, регуляцияси ва таъсир механизми. Гипоталамуснинг ҳозирда маълум бўлган гипофизотроп гормонлари икки гуруҳга бўлинади: ўзига тегишли троп гормон ажралишини кучайтирувчи (рилизинг-гормонлар, либеринлар) ва сусайтирувчи (статинлар) гормонлар. Гипоталамуснинг нейросекретор ҳужайралари 7 хил либерин (соматолиберин, кортиколиберин, тиреолиберин, люлиберин, фоллиберин, пролактолиберин, меланолиберин) ва 3 хил статин (соматостатин, пролактостатин, меланостатин) ишлаб чиқаради. Бу бирикмаларнинг барчаси пептид табиатли ҳисобланади. Гипоталамус гормонлари махсус портал тизим орқали гипофизнинг олд бўлагига (аденогипофиз) тушади. Либеринлар гипофиз троп гормонлари синтези ва секрециясини стимуллайди, статинлар эса ингибирлайди. Либеринлар ва статинларнинг гипофиз ҳужайраларига таъсири цАМФ- ва Са2+ -боғлиқ механизмлар орқали амалга ошади. XX асрнинг 70-йиллари бошида организмда маълум бир либерин (статин) бир вақтнинг ўзида бир нечта гормонга таъсир қилиши мумкинлиги маълум бўлди. 1-жадвалда нисбатан яхши ўрганилган либерин ва статинларнинг тавсифи келтирилган. 7-расм. Гипофиз гормонларининг организмга таъсири 1-жадвал Гипоталамик либерин ва статинлар Омил Таъсир ўрни Асосий биологик самараси Секрециясининг бошқарилиши Кортиколиберин Аденогипофиз Адренокортикотроп гормон(АКТГ)секрецияс ини стимуллайди. Секрецияси стрессларда ва АКТГ камайганда стимулланади. Тиреолиберин Аденогипофиз Тиреотроп гормон (ТТГ) ва пролактин секрециясини стимуллайди. Секрециясини тиреоид гормонлар тормозлайди. Соматолиберин Аденогипофиз Соматотроп гормон (СТГ)секрециясини стимуллайди. Секрециясини гипогликемиястимулла йди. Люлиберин Аденогипофиз Фолликулостимулловчи гормон (ФСГ) ва лютеинловчи гормон (ЛГ)секрециясини стимуллайди. Эркакларда секреция қонда тестостерон миқдорининг пасайишига, аёлларда –эстрогенлар концентрациясининг пасайишига боғлиқ. Қонда ЛГ ва ФСГ нинг концентрацияси секрецияни пасайтиради. Соматостатин Аденогипофиз ЎГва ТТГсекрециясини тормозлайди. Секрецияси жисмоний зўриқишга боғлиқ. Фактор тана тўқималарида тез инфаолланади. Пролактостатин Аденогипофиз Пролактин секрециясини тормозлайди. Секрециясини пролактиннинг юқори концентрацияси стимуллайди, эстрогенлар, тестостерон ва сўриш вақтидаги нерв сигналларини тормозлайди. Меланостатин Аденогипофиз МСГ (меланоцит стимулловчи гормон)секрециясини тормозлайди. Секрециясини меланотонин стимуллайди. Тиролиберин ТТГ ва пролактин ишлаб чиқарилишини стимуллайди; гонадолиберин эса ЛГ ва ФСГ учун умумий ягона рилизинг-гормон ҳисобланади. Соматостатиннинг организмга таъсири ноёб: у нафақат ЎГ нинг базал ва стимулланган секрециясини, АКТГ ва пролактин ажралишини ва уларнинг патологик гиперсекрециясини пасайтиради, глюкагон, инсулин, гастрин, секретин, ҳолецистокинин, вазофаол интестинал пептид секрециясини ингибирлайди. Либеринлар ва статинларнинг регулятор фаолияти фақат аденогипофиз устида амалга ошади. Соматостатин ва тиролиберин МАТ га тўғридан-тўғри таъсир кўрсатиб, турли хулқ-атвор ва ҳаракат реакцияларини амалга оширади. Гипоталамик рилизинг-гормонлар ҳақидаги тасаввурлар ҳозирги вақтда инкор қилинган. Тўқималарда ҳосил бўладиган либерин ва статинлар нисбатан кенгроқ. Гипоталамусдан ташқари, нейропептидлар эпифизда, миянинг бошқа бўлимларида (олд мия, оралиқ миянинг орқа қисми, ортқи мия, орқа миянинг ҳаракат нейронлари, бош мия нервлари ядролари), меъда ости бези ҳужайралари ва МИТ да ишлаб чиқарилади. Гипофиз оёқчалари кесилиши (шикастланиши, босилиши)ҳолатида қон плазмасида ЛГ, ФСГ, ЎГ, ТТГ ва АКТГ миқдори камаяди, пролактин эса, аксинча, ошади. Бу ҳодиса «изоляцияланган гипофиз синдроми» номи остида ўрганилган. Шундай қилиб, гипофизнинг аксарият гормонлари бевосита гипоталамуснинг стимулловчи таъсири остида бўлади, пролактин секрециясига эса гипоталамус ингибирловчи таъсир қилади. Гипофиз оёқчалари қисман кесилганда оралиқ тепалик аксонларидан вазопрессин ва окситоцин секрецияси сақланади, қандсиз диабет ривожланмайди. Гипоталамус йўқотилганда ёки гипофиз оёқчалари юқори кесилганда вазопрессин ва окситоцин, шунингдек, гипофизнинг барча гормонлари продукцияси (пролактиндан ташқари) тушиб кетади. 2-жадвал Аденогипофиз гормонлари Гормон Нишон тўқима Биологик таъсири Секрециянинг бошкарилиши Адренокортико троп гормон (AKТГ) Буйрак усти бези пўстлоқ қавати Буйрак усти бези пўстлоқ қаватида стероидлар секрециясини стимуллайди. Кортиколибери нни стимуллайди. Тиреотроп гормон(ТТГ) қалқонсимон без Тиреоид гормонлар синтези ва секрециясини стимуллайди. Тиреолиберинн и стимуллайди. Соматотроп гормони (ўсиш гормони СТГ) Барча ҳужайраларга РНК ва оқсил синтезини стимуллайди, ҳужайралар ўсишини, тўкималарга глюкоза ва аминокислоталар транспортини таъминлайди. Соматолибери нни стимуллайди ва соматостатинн и тўxтатади. Фолликула стимулловчи гормон (ФСГ) Эркакларда уруғ найчасига, аёлларда туxумдон фолликулаларига Эркакларда спермани, аёлларда эса фолликулани шаклланишини таъминлайди. Люлиберин стимуллайди Лютeинловчи гормон (ЛГ) Эркакларда уруғдон интерстициал ҳужайраларига, аёлларда туxумдонларга. Аёлларда эстроген ва прогестерон секрециясини, эркакларда андроген синтези ва ажралишини кучайтиради. Люлиберин стимуллайди Пролактин Сут безларига (альвеоляр ҳужайраларга) Сут оқсиллари синтезини ва сут безлари ривожланишини стимуллайди. Пролактостати н тўxтатади Меланин стимулловчи гормон(МСГ) Пигмент ҳужайраларга Меланоцитларда меланин синтезини оширади. Меланоцатин тўxтатади Меъёрда пролактин ажратувчи ҳужайралар (лактотрофлар) ҳиссасига аденогипофизнинг 10—25 % ҳужайралари тўғри келади. Ҳомиладорлик вақтида уларнинг миқдори 70% га етади ва гипофиз амалда 2 мартага катталашади. Пролактин - молекуляр массаси 23 кДа бўлган оқсил. Бундан ташқари, меъёрий ҳолатларда бўлгани каби турли гипоталамо-гипофизар касалликларда пролактиннинг нормал биологик фаоллик кўрсатмайдиган «катта» шакллари қонда циркуляцияланиши мумкин (big- ва big-bigпролактин), молекуляр массаси 100 кДа га етади. Одамда пролактин ишлаб чиқарилишида вазофаол интестинал полипептид ва гистидин-изолейцин пептид ҳам қатнашади. Пролактиннинг асосий физиологик функцияси лактацияни таъминлаш ҳисобланади. Ҳомиладорликда пролактотрофлар сонининг ошиши плацентар ва тухумдон эстрогенларининг кучайтирувчи таъсири билан таъминланади. Охиргилар, бундан ташқари, туғруқдан кейин ҳам лактацияни таъминлаш учун пролактин гиперсекрециясини ушлаб туради. Кўкрак билан озиқланиш жараёнининг ўзи ҳам пролактин секрециясига стимулловчи таъсир кўрсатади. Пролактин ажралишининг асосий ингибитори дофамин бўлиб, у гипоталамуснинг ёйсимон ядросида синтезланади. Пролактин секрециясининг кучли стимулятори тиротропин-рилизинг-гормон (ТРГ)ҳисобланади, бу бирламчи гипотиреозда гиперпролактинемия ҳодисасини қисман тушунтириб беради. Гипофизнинг пролактин ишловчи ҳужайралари пролактиндан соматотроп гормонни ажратиш хусусиятига эга. Олимлар фикрича, лактотрофлар ва соматотрофлар умумий ўтмишдош ҳужайраларга эга. Стресс ҳолатларида, талваса, депрессия, кучли оғриқларда (масалан, травмалар, операциялар), психозларда пролактин концентрацияси сезиларли ошади. Гиперпролактинемия, бундан ташқари, нейролептиклар, қайт қилишга қарши воситалар, антигистамин препаратлар, эстрогенлар ва бошқа бир қанча дорилар қабул қилганда ҳам юзага келади. Кўкрак қафасида ўтказиладиган хирургик операциялар, бачадонни тез-тез қиришлар, абортлар оқибатида ҳам гиперпролактинемия ривожланиши мумкин. Пролактин секрециясининг нисбатан аҳамиятли ошиши ҳомиладорликда ва асосан лактация даврида (кўкрак билан озиқлантиришда) юз беради. Ҳомиладорликда эстрогенлар миқдори ошади ва бу пролактин концентрациясининг ошишига олиб келади. Натижада пролактиннинг юқори концентрацияси сут безларининг лактацияга тайёргарлик учун етилиши ва катталашишига олиб келади. D2 дофамин рецепторлари агонистлари (бромокриптин, перголид, каберголин ва бошқалар) ҳамда эстрогенлар антагонистлари тамоксифен, клостильбегит қабул қилинганда пролактин секрецияси пасаяди. Тиреоид гормонлар ва глюкокортикоидлар қабул қилинганда ҳам пролактин секрецияси бирмунча пасаяди. Пролактин фолликулостимулловчи гормон (ФСГ) ва гонадотроприлизинг гормон (ГнРГ) секрециясини ингибирлаб, овуляция циклининг тормозланишига жавоб беради. Гиперпролактинемиянинг ҳам идиопатик шакли фарқланади, бунда гипофиз ҳужайраларининг функцияси ошиб кетади, лекин ҳужайралар сони деярли ўзгармайди. Идопатик гиперпролактинемиянинг сабаблари ҳозирча номаълум. Аёлларда гиперпролактинемия тухумдонда сариқ тана мавжудлик вақтини оширади (циклнинг лютеин фазаси узаяди), овуляцияни тормозлайди ва оқибатда бепуштлик, аноргазмия, фригидлик, жинсий хоҳиш даражасининг пасайиши, сут безлари ўлчамининг макромастия (гигант сут безлари) даражасигача катталашиши, сут безининг киста ёки аденомаси ва ҳатто унинг давомида сут бези раки ривожланишигача олиб келиши мумкин. Пролактин миқдорининг кучли ошиши учун хос ҳолат – бу галакторея. Тиреотроп гормон (ТТГ) 28 кДа молекуляр массали гликопротеид бўлиб, 2 та суббирликдан иборат: ТТГ, ЛГ, ФСГ ва хорионик гонадотропин (ХГ) учун ягона α-суббирлик ва ТТГ учун специфик ß-суббирлик. Тиреотрофлар ҳиссасига аденогипофизнинг 10% ҳужайралари тўғри келади. ТТГ рецепторлари қалқонсимон безнинг эпителий ҳужайралари юзасида жойлашган бўлади. ТТГ нинг асосий функцияси қалқонсимон без гормонларининг биосинтези, заҳираланиши, секрециясини бошқариш ҳисобланади ҳамда тиреоцитларга трофик ва пролифератив таъсир кўрсатади. Тиреоид гормонлар ТТГ секрециясига сусайтирувчи таъсир кўрсатади, бунда T3 (трийодтиронин) нинг таъсир эффекти T4 га нисбатан 40 марта юқори. Шунга қарамасдан, экзоген қабул қилинган T4 ТТГ секрециясини кучлироқ пасайтиради, чунки гипофизга осон етиб боради, ундан кейин у ерда қисман Т3 га айланади (конверция). T4 ва ТТГ секрецияси логарифмик боғланган: ҳатто Т4 даражасининг озгина пасайиши ҳам ТТГ даражасининг сезиларли ошишига олиб келади ва аксинча, бу бирламчи гипотиреоз ва тиреотоксикоз ташхис қўйишда ТТГ даражасини аниқлашнинг клиник аҳамиятини тушунтириб беради. Тиреотропин учун секрециянинг суткалик ўзгариши хос. ТТГ нинг қондаги энг юқори миқдори тунги соат 2-4 да кузатилади, тонгги 6- 8 гача бироз пасаяди, ТТГ нинг энг кам миқдори соат 17-19 га тўғри келади. ТТГ секрецииясининг асосий гипоталамик бошқарувчиси 3 та аминокислотадан ташкил топган ТРГ ҳисобланади. Тиреоид гормонларнинг ТРГ секрециясига таъсири ҳозирги вақтда аниқланмаган. ТТГ нинг базал секрецияси дофаминни, глюкокортикоидлар ва соматостатинни пасайтиради. Ўсиш гормони (ЎГ) аминокислоталардан ташкил топган полипептид бўлиб, унинг тузилиши плацентар лактоген ёки хорионик соматомаммотропинга 92% аналог ҳисобланади. ЎГ ажратиб чиқарувчи ҳужайралар (соматотрофлар) ҳиссасига аденогипофиз барча ҳужайраларининг 50% тўғри келади. Ўсиш гормони, бундан ташқари, соматотропин ёки соматотроп гормон (СТГ) деб ҳам номланади, аммо бу ном кам ишлатилади, чунки ўсиш гормони ТТГ, ЛГ, ФСГ ва АКТГ лар каби тўлиқ мазмунда троп гормон ҳисобланмайди. ЎГ нинг тўқима даражасидаги таъсирлари инсулинсимон ўсиш омили-1 (ИЎО-1) соматомедин С орқали амалга ошади, уларнинг синтези ЎГ таъсири остида жигарда кечади. ИЎО-1 70 та аминокислотадан иборат оқсил бўлиб, у ИЎО-боғловчи оқсил билан комплекс ҳолда қонда айланади. ИЎО-1 катта миқдори ЎГ таъсири остида бевосита нишон-аъзоларда, жумладан эпифизар ўсиш пластинкасида ҳосил бўлади. ИЎО-1 ва ИЎО-2 (соматомедин А) инсулин билан тузилиш жиҳатидан ўхшаш ва соматомединлар билан қатор инсулинга ўхшаш эффектларни юзага чиқаради ЎГ нинг асосий таъсири болалар ва ўсмирларда суякларнинг (асосан узун найсимон ва кам даражада ғовак суякларнинг) бўйига ўсишини кучайтириш ҳисобланади. Пренатал ва неонатал даврларда ЎГ нинг бўйга таъсири аҳамиятсиз, шу туфайли ЎГ танқислиги билан туғилган чақалоқлар бўйи нормага яқин бўлади. ЎГ суяк тўқимасидаги алмашинувни фаоллаштириб, суяк ҳосил бўлиш жараёнини кучайтиради ва остеорезорбцияни паст даражага туширади. Яъни, суяклар ўсишига таъсири бўйича ЎГ метаболик эффектларнинг кенг спектрига эга. ЎГ организмда азот ўзлаштирилиши ва оқсил синтезини стимулловчи анаболик гормон ҳисобланади. ЎГ ҳатто овқатга энергетик эҳтиёж чегараланганда ҳам ифодаланган липолитик таъсир кўрсатади. ЎГ сув-туз алмашинувига антинатрийуретик таъсир кўрсатиб, плазмада ренин фаоллиги ва алдостерон даражасини ошириш билан бир вақтда ҳужайра ташқарисидаги суюқлик ҳажмининг ошишига олиб келади. ЎГ углевод алмашинувига икки босқичли таъсир қилади. ЎГ нинг физиологик дозасини қабул қилганда у қисқа вақт (дастлабки 2 соатда) инсулинсимон таъсир қилиб, гликемияни бироз пасайтиради, сўнгра контринсуляр таъсир кўрсатади. Биринчи таъсир глюкозанинг жигардан продукциясини пасайтириш ва унинг периферик утилизациясини кучайтириш ҳисобига юзага чиқади; иккинчиси, қарама-қарши, глюкозанинг жигардан продукциясининг фаоллашиши ва углеводларнинг периферик заҳираланишини секинлаштириш билан боғлиқ. 8-расм. ЎГ нинг таъсир механизми ЎГ нинг синтези ва секрецияси 2 та гипоталамик нейропептид — ЎГ нинг рилизинг-гормонлари соматолиберин (ЎГ-РГ)ва соматостатин ёрдамида бошқарилади. ГР-РГ нинг асосий продуценти гипоталамуснинг ёйсимон ядроси ҳисобланади. Соматостатин бевосита гипоталамуснинг паравентрикуляр ва медиалпреоптик соҳаларида, бундан ташқари, бош миянинг нейротрансмиттер функциясини бажарувчи бошқа кўп соҳаларида секрецияланади. Бундан ташқари, соматостатин ичак ва меъда ости бези Лангерганс оролчаларининг D-ҳужайраларидан ҳам секрецияланади. Кун давомида ЎГ плазмада паст даражада сақланади; унинг миқдори овқат қабул қилгандан сўнг чўққига чиқади, уйқу вақтида прогрессив ошади. ЎГ нинг интеграл суткалик даражаси ўсаётган болаларда катталарникидан юқори бўлади.ЎГ секрецияси бошқа кўпчилик гормонлар каби даврий амалга ошади ва сутка давомида қатор чўққиларга эга (одатда ҳар 3-5 соатдан кейин секреция чўққиси бўлиб ўтади). Энг юқори эҳтимолий чўққи тунда, ухлашга ётгач 1-2 соатдан кейин бўлади. ЎГ секрециясининг пасайиши гипергликемияда, қонда эркин ёғ кислоталар миқдори ошганда, серотонин антагонистлари (метизергид, ципрогептадин), α-адренергик антагонистлар (фентоламин), дофаминергик антагонистлар (хлорпромазин, галоперидол), теофиллин, прогестерон қабул қилинганда кузатилади. Ҳолецистокинин, ацетилҳолин, ВИП опиоид пептидлар гипоталамусдан соматостатин ва соматолиберин секрециясига таъсир қилиш орқали ЎГ секрециясини кучайтиради. Лютеинловчи ва фолликулостимулловчи гормонлар (ЛГ ва ФСГ) гонадотрофлардан секрецияланади, улар ҳиссасига аденогипофизнинг 10% ҳужайралари тўғри келади, бунда кўпчилик гонадотрофлар ҳам ЛГ, ҳам ФСГ ишлаб чиқаради.Кўрсатилганидек ЛГ ва ФСГ гликопротеидлар бўлиб, идентик а- ва уникал β-суббирликлардан иборат. ЛГ ва ФСГ гонадалар функциясини бошқаради. Принципиал тарзда, аёл организмида ЛГ ва ФСГ секрецияси циклик амалга ошади, бу ҳолат аёлларда жинсий системанинг фазали функционаллашганини тушунтиради. Эркак организмида бундай цикллилик бўлмайди. Гонадотропинлар секрециясининг характери гипоталамик гонадотропин-рилизинг-гормон (ГТ-РГ) продукцияси билан аниқланади. Гипоталамус — гонадотрофлар тизимининг ишлаш характерини шаклланиши ҳомила даврида тестикуляр андрогенлар таъсирида амалга ошади: улар йўқлигида тизим аёллардаги типда циклик ишлашни бошлайди. ФСГ тухумдонлар ва уруғдонлардаги ўз нишон ҳужайралари мембранасидаги рецепторлар билан боғланади, натижада аденилатциклаза системасининг фаоллашуви юз беради. Ҳосил бўлувчи цАМФ протеинкиназани фаоллайди, у эса ФСГ таъсирини юзага чиқарувчи оқсилни фосфорлайди. ФСГ тухумдонда фолликулалар ривожланишини ва эстрогенлар ҳосил бўлишини тезлаштиради, Сертоли ҳужайрасига таъсир қилиб эса сперматогенез жараёнини кучайтиради, ФСГ уруғдонлар ва уруғ найчаларининг ривожланиши ҳамда ишлашини таъминлайди. ЛГ тухумдонда тека ҳужайраларида андрогенлар синтезини стимуллайди, уруғдонда Лейдиг ҳужайраларидан тестостерон продукциясининг регулятори, сперматогенезга таъсир қилади ва асосий «эркаклик» гормони ҳисобланади. ЛГ даражасининг ёш болаларда пастлиги ва менопауза ҳолатидаги аёлларда юқорилиги норма ҳисобланади. Адренокортикотроп гормон (АКТГ, кортикотропин) кортикотрофлардан ишлаб чиқарилади, улар ҳиссасига аденогипофиз барча ҳужайраларининг 15%и тўғри келади. АКТГ ўтмишдоши йирик (265 та аминокислотали) проопиомеланокортин (ПОМК) оқсили ҳисобланади. ПОМК молекуласи парчаланишидан эквимоляр миқдорларда, 39 аминокислотадан иборат АКТГ, а- ва γ-меланоцитостимулловчи гормон (МСГ), ß-липотроп гормон (ß-ЛПГ) ҳосил бўлади. Унинг давомида эса АКТГа- МСГ ва кортикотропинсимон оралиқ пептидга парчаланиши мумкин. ß-ЛПГ парчаланиб ß-МСГ ҳамда α-, γва ß-эндорфинларга айланади. Барча саналган бирикмалар ПОМКдериватлари сифатида белгиланади. АКТГ функцияси буйрак усти бези пўстлоғининг коптокчасимон ва тўрсимон қаватида мос равишда кортизол ва андрогенлар синтезини бошқаришдан иборат. АКТГ барча кортикостероидлар синтезининг дастлабки босқичларига стимулловчи таъсир кўрсатади, шу туфайли у алдостерон секрециясини ҳам фаоллайди. Алдостероннинг коптокчасимон зонадан продукцияси бевосита ренин—ангиотензин— альдостерон системаси орқали бошқарилади. Шундай қилиб, АКТГ танқислигида альдостерон продукцияси ўзгармайди. АКТГ синтези ва секрециясининг асосий бошқарувчиси бевосита гипоталамуснинг паравентрикуляр ядроларидан секрецияланувчи кортикотропин-рилизинг-гормон (КРГ) ҳисобланади. АКТГ нинг (шунингдек, либерин ва глюкокортикоидларнинг) максимал секрецияси эрталаб соат 6-8 да, минимал секрецияси эса —соат 18 ва 23 оралиғида қайд етилади . АКТГ секрециясининг асосий ингибитори кортизол ҳисобланади. КРГ, АКТГ ва кортизол секрециясининг бошқарилиши қайта манфий боғланиш билан характерланади, гипофизга бўйсунадиган барча эндокрин безлар (буйрак усти безлари пўстлоғи, қалқонсимон без, гонадалар) функцияси асосида бу механизм ётади. Исталган физиологик ёки экзоген стрессор таъсир организмда АКТГ ва мос равишда кортизол секрециясининг стимуляциясига олиб келади ва шу билан организм адаптациясини таъминлайди. АКТГ секрецияси типик циркад ритм билан характерланади. Гипофизнинг барча гормонлари оқсиллар ёки пептидлар ҳисобланади. Циклик АМФ (цАМФ) барча гипофизар гормонларнинг (соматотропин ва пролактиндан ташқари) ҳужайра ичидаги воситачиси бўлиб хизмат қилади. Гипоталамуснинг супраоптик ва паравентрикуляр ядролари аксонларидан иборат бўлган нейрогипофиз мустақил ва автоном система ҳисобланади. Вазопрессин (аргенин-вазопрессин, антидиуретик гормон, АДГ) 9 та аминокислотадан иборат пептид. АДГ буйрак дистал каналчалари У-2 рецепторларига бирикади. Уларнинг активланиши сув реабсорбциясини кучайтиради. Юқори концентрацияларда АДГ томирларнинг В2- рецепторларини активлайди ва уларнинг торайишига олиб келади. Физиологик ҳолатларда АДГ секрецияси гипоталамусдаги осморецепторлар орқали бошкарилади. Плазмадаги гиперосмолярлик АДГ секрециясини стимуллайди. Бошқа билвосита АДГ секрециясини стимулловчи омиллар гиповолемия ва артериал гипотензия ҳисобланади. Бундай ҳолларда афферент қисм бўлиб бўлмачаларнинг волуморецепторлари, каротид синусидаги ҳамда, аортадаги барорецепторлар ҳисобланади. Улар супраоптик ва паравентрикуляр вегетатив нервлардан ва оралиқ, ўрта миядаги ретикуляр формациясидан импульс олади. Окситоцин гипоталамуснинг кўпрок паравентрикуляр ва озроқ супраоптик ядроларида синтезланади. У ҳам вазопрессин каби 9 та аминокислотадан иборат, аммо унда 2 та аминокислота ортиқча. Окситоцин бачадон мускулларига таъсир килади ва унинг қисқариш кучини ошириб беради. Шу туфайли окситоцин туғруқ жараёнида ва туғруқдан кейинги жараёнларда бачадон қискаришини таъминлайди. Окситоцин сут бези альвеолаларидаги миоэпителиал ҳужайралар қисқаришини стимуллайди ва сут йўлларидан сут келишини амалга оширади. Окситоциннинг физиологик стимуляторлари сут билан боқиш ва аёл жинсий аъзолари йўлларининг кучли даражада чўзилиши ҳисобланади. Окситоцин секрециясини эстроген стимуллайди, алкогол эса пасайтиради.